పట్టుదలతో పతకాల వర్షం… అంతర్జాతీయ వేదికపై ఆదోని మహిళల ఘనత...
DNB News - ఆంధ్రప్రదేశ్ / : ప్రతిభ, పట్టుదల ఉంటే వయసుతో సంబంధం లేకుండా ప్రపంచాన్ని జయించవచ్చని అదోని పట్టణానికి చెందిన ఇద్దరు మహిళా క్రీడాకారిణులు నిరూపించారు. థాయిలాండ్ వేదికగా ఏప్రిల్ 17 నుండి 20 వరకు జరిగిన వరల్డ్ మాస్టర్స్ స్పోర్ట్స్ ఛాంపియన్షిప్స్లో పాల్గొన్న శ్రీమతి నీలం భండారి మరియు శ్రీమతి హరిత కుమారి అద్భుత ప్రదర్శనతో భారతదేశానికి పలు పతకాలు అందించారు. పట్టుదలతో శిఖరాలకు… శ్రీమతి నీలం భండారి: గత పదేళ్లుగా మాస్టర్స్ అథ్లెటిక్స్లో నిరంతర సాధనతో ముందుకు సాగుతూ, అంతర్జాతీయ స్థాయిలో తన ప్రతిభను చాటుతున్నారు. మూడు సార్లు అంతర్జాతీయ, ఎనిమిది సార్లు జాతీయ స్థాయి పోటీల్లో పాల్గొని, మొత్తం 35 పతకాలు సాధించి యువతకు ఆదర్శంగా నిలిచారు. శ్రీమతి హరిత కుమారి: అదోని ఆర్ట్స్ అండ్ సైన్స్ కళాశాలలో టైపిస్ట్గా పనిచేస్తూ, గృహిణిగా బాధ్యతలు నిర్వహిస్తూనే క్రీడలపై ఆసక్తిని కొనసాగించారు. పిల్లలు పెద్దవారైన తర్వాత మళ్లీ క్రీడల్లోకి అడుగుపెట్టి, ఈ పోటీల్లో విశేష ప్రతిభ కనబరిచారు. సాధించిన పతకాలు: నీలం భండారి: షాట్పుట్ (వెండి), 100 మీటర్ల స్ప్రింట్ (వెండి), 2 కి.మీ వాక్ (కాంస్యం) హరిత కుమారి: డిస్కస్ త్రో (స్వర్ణం), 100 మీటర్ల స్ప్రింట్ (స్వర్ణం), 2 కి.మీ వాక్ (వెండి) అంతర్జాతీయ క్రీడల వేదికపై భారత జాతీయ పతాకాన్ని గర్వంగా ఎగరవేసిన ఈ ఇద్దరు క్రీడాకారిణులు తమ విజయానికి కఠిన సాధనే కారణమని తెలిపారు. వారి విజయంపై పలువురు ప్రముఖులు, క్రీడాభిమానులు అభినందనలు తెలిపారు. సాధారణ మహిళలు కూడా పట్టుదలతో అసాధారణ విజయాలు సాధించగలరని ఆదోని క్రీడాకారిణులు మరొక్కసారి నిరూపించారు.
Admin
DNB News
మరిన్ని వార్తలు
Developed By :
